الإنسان هو الكائن العظيم اللى أعظم حاجة عملها إنه جاب علم الفلسفة والمنطق لعالم كان يعيش في الفوضى,وبذلك طوع العالم كله لرغباته عن طريق تعليم الكون النظام والمنطق والمحشى.
!كل الكلام اللى فوق دا هرى.
الحقيقة إن الإنسان مش هو اللى اخترع المنطق ولا الفلسفة (يمكن المحشى). الكون كله طول عمره ماشى بنظام أدق من الساعة، و لا يمكن فى يوم من الأيام يحيد عنه. حركة الكواكب، النظام البيئى (أيوة اللى احنا بوظناه هو دا) عادات كل حيوان ونبات وكل جزء من الكوكب، الألوان، الأصوات ...
كل حاجة ماشية تمام.
طب ليه الإنسان بس هو اللى يعرف علم المنطق؟ ليه هو بس اللى واخد باله من النظام والكون والحاجات دى، ليه هو شايف منطق؟
دا ﻷن كل حاجة ماشية فى الكون بالمنطق، إلا الإنسان.
تخيل الموضوع كأنه شخص راكب عربية، ومش شايف أى حاجة برا العربية دى، والعربية دى بتتحرك على أرض مفهاش مطب.
محدش هيعرف أن العربية دى بتتحرك إلا اللى واقفين براها وبيتفرجوا عاليها.
ومفيش كائن فى الكون هياخد باله من المنطق الكونى إلا الكائن الوحيد اللى مش ماشى بيه.الإنسان.
طب إزاي ياعم؟ إزاي تقول الإنسان مش منطقى؟
تهييس ثانوية يا كابتشن تقول ايه!
لا بجد هضربلك مثال.
إحنا على البسيطة بقالنا 7000 سنة (منذ نشأة الحضارة الفرعونية، أول حضارة وكدا) ولسى لحد دلوقتى مفهمناش إن الحرب غلط وبتقتل ناس وكل الحاجات الوحشة دى. بالمنطق كدا، فى معادلة تقعد 7000 سنة ما تتحلش؟!
دا الحيوانات يا عم، الحيوانات اتفقت على نظام تتخانق بيه وتاكل بيه بعضها وعايشين مع بعض عادى! فكرك إحنا ممكن نوصل للدرجة دى من التطور؟
إحنا اعتنقنا المنطق من فترة طويلة جداً لدرجة إن إحنا فهمنا كل حاجة في الدنيا ماشية إزاي و عرفنا نطوعها حسب رغبتنا و نبقى أكتر نوع من الكائنات مزدهر على وجه الارض. فهمنا فعلا ً كل حاجة إحنا اتعاملنا معاها،بل و في حاجات مشوفنهاش و فهمناها برضه (فيزياء نظرية و كدهو) لكن ما يزال فيه حاجة واحدة إحنا مقدرناش نفهمها. الحاجة الوحيدة في الكون ده اللي مش ماشية بالمنطق (لو بصيت فوق هتلاقيها في أول الصفحة).
هتقولي لا إحنا فاهمين الإنسان و عندنا علم نفس و بتنجان؛
استعنا ع الشقى بالله.
أولا ً مش علم النفس بس هو اللي اختص بدراسة الإنسان،فيه فلسفة و أحياء و حاجات كتير جداً حاول العلم بيها إنه يفسر أو يتوقع تصرفات هذا الكائن الغريب. هرمونات و مؤثرات حياتية...إالخ إلخ.
ثانيا كل العلوم دي دقتها في قياس الإنسان و تصرفاته زي دقة الكف في قياس الطول. لا يعتمد عليها. أنا بقول كده كواحد خُضت في علوم قياس الإنسان دي فترة من حياتي، كلها قواعد تقريبية عامة و شواذها تفوق عدداً الملتزمين بها، هدفها قياس كائن مثالي مكتوب في الكتب و غير موجود في الحقيقة. ده غير إن فيه حاجات إحنا طبعا مش لاقينلها تفسير.
زي البوسة!
آيوه متعمليش فيها مكسوف، البوسة! كل العلوم البشرية من أول علم النفس السلوكي لحد الاحياء الجزيئية مش قادرة تفسر أو حتى تقترب من تفسير ليه البني آدم بيستمتع بالبوسة!
قيس على كده كتير بقى. و سبب الحيرة دي أن البني آدم مش جزء من العالم المنطقي عشان تحللوه بالمنطق! لكم شرف المحاولة برضه.
ندي للبني آدم حقه برضه. هو الحاجة اللي كسرت روتين الكرة الارضية برضه.
أحسن حاجة البني آدم عملها، أو أكتر حاجة المفروض يعتز بيها؛ إنه متبعش المنطق و حول العالم لرغبته هو. خرج بره نطاق المنطق و مع ذلك استعمله و فهم الدنيا ماشية إزاي. أعظم هدية من الإنسان للكون مكانتش النظام. لكن إنه طوره و كسر النظام.
أعظم هدية من الإنسان للكون كانت الفوضى.
No comments:
Post a Comment